jueves, 12 de noviembre de 2026

PDI. 4ºB .Que levamos ao espazo? Unha misión para aprender a decidir en equipo.

Que levamos ao espazo? Unha misión para aprender a decidir en equipo.

 O alumnado de 4º de Educación Primaria continúa a súa aventura espacia. Dentro da área de Proxecto Competencial, e en conexión co noso Proxecto Documental Integrado (PDI) Couceiro Star: unha escola entre estrelas, desenvolvemos unha nova actividade que nos convida a reflexionar, dialogar e tomar decisións de maneira cooperativa.

 Nesta ocasión, a nosa misión parte dunha pregunta aparentemente sinxela: 

Que necesitariamos levar se tivésemos que realizar unha viaxe ao espazo?

 Preparando a equipaxe espacial Para resolver este reto, o alumnado, organizado en pequenos equipos, debe analizar diferentes obxectos que poderían formar parte da equipaxe dunha misión espacial: auga, alimentos, osíxeno, roupa, ferramentas, medicamentos, libros, xoguetes, dispositivos electrónicos e moitos outros. 

 A partir de tarxetas ilustradas, cada equipo ten que clasificar os obxectos en tres categorías: Imprescindible: aquilo que consideramos necesario para vivir e desenvolver a misión. 
 Útil: elementos que poden facilitarnos a vida ou o traballo no espazo. 
 Non necesario: obxectos dos que poderiamos prescindir durante a viaxe. 

 Pero a actividade vai moito máis alá dunha simple clasificación. Aprendemos a pensar, dialogar e chegar a acordos O verdadeiro desafío consiste en escoitar as opinións dos compañeiros e compañeiras, defender as propias ideas con argumentos e chegar a decisións compartidas.

 É imprescindible levar un libro? Podería resultar útil unha planta? Que fariamos cun teléfono móbil no espazo? Todas estas preguntas favorecen a reflexión e permiten descubrir que unha mesma decisión pode valorarse desde diferentes perspectivas. 

 Nesta misión non buscamos que todos os equipos dean exactamente as mesmas respostas, senón que sexan capaces de explicar por que tomaron determinadas decisións. Deste xeito, traballamos aprendizaxes fundamentais da área de Proxecto Competencial, como o pensamento crítico, a resolución de problemas, a comunicación oral, a cooperación, a negociación e a toma responsable de decisións.

 2. Unha misión na que todas e todos temos algo que achegar.
  A actividade está deseñada para favorecer a participación de todo o alumnado mediante materiais visuais, tarefas manipulativas e diferentes posibilidades de intervención, respectando os distintos ritmos e necesidades de aprendizaxe. Porque nunha misión espacial, igual que na nosa escola, cada integrante do equipo é importante e todas as achegas contan. 

 3. Aprender mirando cara ás estrelas . A través de propostas como esta, o noso PDI convértese nun fío condutor que permite conectar o coñecemento do universo co desenvolvemento de competencias útiles para a vida cotiá. O espazo é o escenario da nosa aventura, pero as aprendizaxes van moito máis alá dos planetas, das estrelas ou das naves espaciais. Aprender a escoitar, argumentar, respectar diferentes opinións e construír solucións colectivas tamén forma parte da preparación dunha boa tripulación. En Couceiro Star seguimos avanzando na nosa misión espacial, porque para chegar lonxe non só precisamos unha nave... tamén necesitamos aprender a traballar xuntos! 

 No seguinte enlace podedes ver a actividade completa: https://larpeiradasdepalabras.blogspot.com/2026/11/que-levamos-ao-espazo-unha-mision-para.html

Exposición “Os nosos castelos: a pegada señorial dos Andrade”. 6º A e B

O Instituto de Estudos Galegos Padre Sarmiento (CSIC, Xunta de Galicia) inagurou o martes 3 de novembro de 2026 a exposición “Os nosos castelos: a pegada señorial dos Andrade”.

 A mostra está organizada polo grupo de investigación “Historia Social do Poder desde a Idade Media” do IEGPS, dirixido por Amparo Rubio Martínez, científica titular do CSIC, e conta co apoio da Axencia Turismo de Galicia, o Concello de Pontedeume e a Secretaría Xeral da Lingua da Xunta de Galicia. 


A exposición reúne unha quincena de paneis que exploran distintas manifestacións da relevancia histórica e patrimonial dos Andrade, con especial atención a Pontedeume e a súa contorna. Os contidos abarcan as arquitecturas señoriais e a súa evolución, a liñaxe dos Andrade e as súas redes familiares, a súa presenza na documentación histórica, así como a pegada cultural que esta liñaxe e as súas fortalezas deixaron ao longo do tempo, reflectida en lendas, obras literarias e outras expresións culturais.


 A exposición “Os nosos castelos: a pegada señorial dos Andrade” poderá visitarse na Casa da Cultura do 3 de novembro ata o 15 de novembro de 2026. 


 O alumnado de 6º visitamos a exposición e foi xenial!!! 


 

miércoles, 11 de noviembre de 2026

POLOS CREATIVOS E BIBLIOTECA CREATIVA,1º A

A clase de 1ºA iníciase este curso en robótica e programación! 


Nas últimas semanas comezamos a traballar robótica, programación e pensamento computacional.

 En primeiro lugar, empregando o recurso Kodable online, no que resolvemos diferentes desafíos a través da programación con frechas.

 A continuación, utilizamos os robots Blue-Bot e Coding Set para poñer en práctica todo o aprendido no mundo dixital no mundo físico. Non é nada sinxelo, pero pouco a pouco, coa práctica, seguiremos a mellorar e aprender de xeito divertido!

PDI. SAMAÍN E LECTURA ÁS ESCURAS 2026 .

Boas rapazada do Couceiro! Aquí tedes a recompilación de fotos do Samaín e Lecturas ás escuras 2026 !!

lunes, 9 de noviembre de 2026

NOVIDADES : REPORTERO DOC -REVISTA CARACOLA- O PAPAGAIO

Rapazada do Couceiro!! 

 Xa temos na biblio novidades das revistas Reportero Doc, Revista Caracola e o xornal O papagaio.
 Animádevos a vir a biblio e pedilas prestadas!!! 

 Unha revista, un xornal ou un libro poden abrir portas diferentes ao coñecemento, á imaxinación e á conversa. Por iso, a biblioteca escolar incorpora novas propostas de lectura: as revistas Reportero DOC e Caracola, e o xornal O Papagaio. 

Estas publicacións están xa dispoñibles para que a comunidade educativa as explore con calma, na biblioteca e na aula. Neste artigo veremos como poden acompañar os hábitos lectores e crear novas oportunidades para ler, preguntar, investigar e compartir. 

 A chegada de Reportero DOC, Caracola e O Papagaio amplía o mapa de lecturas da biblioteca. Son novas opcións para escoller segundo o momento, a curiosidade ou as ganas de ler de cada nena e cada neno.

   Ler tamén é cambiar de formato Ler non significa achegarse sempre ao mesmo tipo de texto. Os libros, as revistas e os xornais ofrecen ritmos, extensións, deseños e formas de presentar a información diferentes. Combinalos axuda a construír unha relación máis rica, flexible e autónoma coa lectura.

Prensa en galego: ler o mundo na nosa lingua .Achegar a prensa ás nenas e aos nenos en lingua galega é unha maneira de ampliar os espazos nos que o galego está presente. Permite ler, conversar e expresar opinións na lingua da comunidade, con naturalidade e sentido, a partir de textos que poden conectar coa vida cotiá e co interese do alumnado.

jueves, 5 de noviembre de 2026

MES DA CIENCIA EN GALEGO DAS BIBLIOTECAS ESCOLARES 2026

Desde a Consellería de Cultura, Lingua e Xuventude, en colaboración coa Conselleria de Educación, Ciencia, Formación Profesional e Universidades, vense impulsando a celebración anual do mes de novembro como o MES DA CIENCIA EN GALEGO NAS BIBLIOTECAS. Iníciase esta actuación coa elección dunha imaxe e a difusión dun texto, a modo de MANIFESTO, de Jesús Ángel Sánchez García, historiador da arte e investigador en historia da arquitectura e do urbanismo de Galicia. Catedrático de Historia da Arte na Universidade de Santiago de Compostela, desde 2021 coordina o grupo de investigación IDEAHS. "Os historiadores da arte temos entre as nosas liñas de traballo preferentes o estudo das imaxes. Desde hai miles de anos os artistas crearon imaxes para satisfacer os gustos das elites, transmitir mensaxes sociais, demostrar talento ou provocar. Coa IA este poder de producir imaxes volveuse máis democrático ca nunca. E tamén formula novos retos. A cidadanía vese inmersa nun fluxo continuo de imaxes que saltaron das pantallas brancas ás pantallas negras para colonizar os espazos das nosas cidades. Ante o risco de ficar como suxeitos pasivos e consumidores dos contidos decididos por algoritmos, a historia da arte pode dar á cidadanía a capacidade de reflexionar sobre os significados, as intencións e as cualidades estéticas desta iconosfera. Como humanistas que combinamos unha formación especializada na cultura visual e material coa preparación para comprender os seus contextos, os historiadores da arte podemos proporcionar saberes e xerar reflexións de longo percorrido, un pensamento lento e demorado, cada vez máis necesario fronte ao consumo rápido a base de clics". Jesús Ángel Sánchez García

                                                  Unha escola entre estrelas: Couceiro Star

O proxecto “Unha escola entre estrelas: Couceiro Star” trata sobre o espazo e a astronomía. A través del, achegámonos ao coñecemento do universo, das estrelas, dos planetas e doutros fenómenos relacionados co espazo, fomentando no alumnado a curiosidade, a capacidade de preguntar e o interese por descubrir como funciona o mundo que nos rodea. 

 Nas aulas estamos traballando moito arredor da ciencia mediante a observación, a investigación, a experimentación e a procura de respostas. Cada actividade permítenos aprender algo novo e comprender que a ciencia está presente na nosa vida cotiá.
Ao longo do curso haberá novas propostas e sorpresas que nos axudarán a seguir explorando este universo tan fascinante. Será unha viaxe compartida na que poderemos aprender, imaxinar e descubrir moito máis sobre o espazo. 

 O Mes da Ciencia en Galego encaixa plenamente co noso proxecto, xa que no Couceiro cremos no valor da ciencia e na importancia de traballala e comunicala en lingua galega. O galego é tamén unha lingua para investigar, formular hipóteses, explicar descubrimentos e achegarnos ao coñecemento científico. Porque a ciencia tamén se fai en galego e porque, na nosa escola entre estrelas, queremos continuar aprendendo, descubrindo e soñando sen límites.

miércoles, 4 de noviembre de 2026

PDI. "A CÁPSULA ESPACIAL" 5º A E B DE EDUCACIÓN PRIMARIA

 "A CÁPSULA ESPACIAL"

Nas aulas de 5º de Primaria, durante este primeiro trimestre, estamos a levar a cabo unha dinámica de cohesión de grupo.

Cada venres, un neno ou nena da aula, leva a cápsula espacial para a súa casa. Imaxinando que temos que abandonar o planeta Terra, teñen a gran misión de escoller soamente 3 obxectos de gran importancia para eles/as, que levarían a un novo planeta onde comezar unha nova vida.

Ao luns seguinte, o elexido ou elexida, ten que ensinar os obxectos e explicar o motivo da súa elección, cunha posterior rolda de preguntas para resolver dúbidas.

Temos unha gran oportunidade para coñecer un pouco máis, e mellor, aos compañeiros/as da clase!



VI Edición " OS NOSOS CASTELOS". INSTITUTO DE ESTUDIOS GALLEGOS PADRE SARMIENTO. 5º E 6º E. PRIMARIA.

Obradoiros sobre o patrimonio material de Pontedeume 

 Nunha xornada de novembro de 2026, o alumnado de 5º e 6º de educación primaria participou nuns obradoiros organizados polo Instituto GalLego Padre Sarmiento, centrados no coñecemento e na divulgación do patrimonio material do nos vila, Pontedeume. 

 Durante a actividade, o alumnado elaborou un fanzine, unha publicación artesanal e colectiva na que se combinan textos, debuxos, ilustracións, fotografías, recortes e outras creacións para comunicar ideas e compartir coñecementos.

 A través deste traballo, puidemos investigar, reflexionar e expresar o que aprendemos sobre os elementos do patrimonio material que forman parte da historia e da identidade da nosa vila: edificios, monumentos, rúas, pontes, obxectos e outros bens que debemos coñecer, valorar e conservar.

 Tamén nos explicaron o labor que está a desenvolver o Instituto Gallego en relación con Pontedeume e achegáronnos ao traballo de investigación e divulgación que se está a realizar sobre o patrimonio da nosa localidade. Ademais, nesa mesma xornada inaugurábase unha exposición dedicada a esta temática, que permitirá os eumeses e eumesas coñecer mellor a riqueza patrimonial que temos ao noso arredor.

 Foi unha experiencia fantástica e moi enriquecedora. Aprendemos un montón dunha maneira dinámica, creativa e participativa

 Queremos agradecerlles sinceramente a súa visita, o seu tempo e todo o que compartiron connosco.

 Agardamos poder gozar de novas visitas e de máis obradoiros tan interesantes e enriquecedores coma este!


PDI. Samaín, Magosto e... Cohete espacial! 1º e 2º de Educación Primaria

En relación ao Samaín e Magosto, este ano dende o 1º ciclo (1º e 2º de primaria) festexamos o Samaín e o Magosto con diferentes actividades: creacións de cestas con bricks de leite para comer as castañas; baile e castañada no patio do colexio xunto ao resto de cursos; unha visita á exposición de libros de Samaín; creación de cabazas con materiais de outono, seguindo o reto de Güino e contribuíndo ao coidado do noso ecosistema; lectura ás escuras empregando lanternas; e apadrinamento lector, no que os cursos máis altos veñen a compartir cos rapaces máis pequenos os contos que crearon sobre o Samaín. 

Con respecto ao PDI, nas aulas de 2º de Primaria creamos un cohete espacial con material de refugallo para lanzarnos nunha aventura espacial e conocer o noso planeta, así como o resto de planetas e astros do Sistema Solar.

Así, realízanse diversas actividades para construir o aprendizaxe do alumnado.

















POLOS CREATIVOS E BIBLIOTECA CREATIVA 6º A E B.

Un misterio medra en sexto…

 Hai algo que está a acontecer ás agochadas nos Polos Creativos e na Biblioteca Creativa… E para que servirá todo este traballo? 

 O alumnado de sexto está a empregar a súa creatividade, o seu esforzo e o material dispoñible para elaborar unhas bolsas moi especiais, decoradas co lema do proxecto deste ano do PDI Couceiro Star. Pero este proxecto é moito máis ca unha actividade artística. 

Durante o proceso, as nenas e os nenos están a aprender importantes conceptos de educación financeira: están a calcular canto custan os materiais, a valorar o tempo investido na elaboración de cada bolsa e a reflexionar sobre que prezo sería axeitado para os produtos.

 O seu obxectivo é preparar un posto de venda de produtos e recadar fondos para a excursión de fin de etapa de sexto. Deste xeito, están aprendendo que detrás de cada produto hai materiais, traballo, organización e responsabilidade. 


 Están moi emocionados, traballando arreo e poñendo toda a súa ilusión en cada creación. Cada bolsa leva unha parte do seu esforzo, da súa imaxinación e das súas ganas de facer realidade unha viaxe moi especial. A pouco que agardemos, o misterio quedará resolto… e poderemos descubrir todas as creacións que están a preparar!