Nova exposición

Vimos de poñer na entrada do noso cole unha exposición de libros dividida en dúas seccións:

• A primeira é unha achega do ANPA do cole. Dentro do seu programa “MEDRANDO EN IGUALDADE”, programa de actividades de promoción da igualdade e prevención da violencia de xénero realizado  este curso, mercaron unha escolma de libros sobre esta temática, parella á do noso PDI "NO COUCEIRO POLA IGUALDADE".

                                          Agradecemos a súa doación á nosa biblioteca.

A segunda parte desta exposición son volumes para pais, nais e profesorado sobre  educación, características do neno e da nena, movementos pedagóxicos... Convidámosvos a participar no sistema de préstamo da biblioteca. Os pais e nais tendes un horario reservado para vós (Luns 8:45- 9:30 e mércores de  13:00 a 13: 45). Colleredes os libros a nome do voso fillo ou filla.

Visitade a exposición!

 Estará ata remates da vindeira semana, logo xa pasará aos andeis da nosa biblioteca e poderedes levar os libros como empréstito para as vosas casas.

Grazas pola vosa participación.

Curtametraxe "El jefe". Fernando Tato

Hoxe visitounos Fernando tato e o alumnado de 5º e 6º de Primaria viu na súa compaña a súa última curtametraxe "El jefe" que nos fala da igualdade no empreo e dos teitos de cristal.

 Fernando Tato é un actor, director, ilustrador e músico  galego que protagonizou a serie diaria de TVG "O Faro" durante máis de dous anos, emitido tamén en TV3 e outras comunidades con gran éxito de audiencia. Anteriormente participou noutras series da TVG como "Libro de familia" ou "Matalobos" e recentemente protagonizou a miniserie "Hotel Almirante" dirixida por Antonio Cuadri.

É licenciado en Arte Dramático pola Esad de Galicia e en Historia da Arte pola Universidade de Santiago de Compostela, posteriormente formouse durante catro anos no estudo de Lorena García de las Bayonas en Madrid.


                                            Para máis información premede na imaxe!

Logo do pase puideron facerlle preguntas sobre aquelas dúbidas e curiosidades que tiñan sobre o mundo do cine e sobre as diferentes facetas do seu labor profesional.

Foi unha proxección que nos fixo cuestionar sobre a igualdade no traballo, o esforzo para conquerir logros laborais, a importancia das tarefas compartidas no fogar, da responsabilidade paterna e materna, etc

Moitas grazas por compartir o teu tempo con nós, Fernando! E grazas tamén a Cristina a nai dunha alumna de 6º, sen a súa colaboración coa nosa escola esta actividade non sería piosible.

Aquí vos deixamos a "curta" e outras mostras da creatividade de Fernando Tato.

Lendo en familia coas "Mochilas Viaxeiras".

A "Mochila Viaxeira" permite á biblioteca escolar o contacto coas familias nunha actividade que pretende a súa colaboración na formación dos lectores e lectoras máis novos.

Nenas e nenos son os embaixadores da biblioteca nas súas casas e comparten cos seus, grandes e pequenos, os libros, as revistas, a música cos que a mochila vai cargada.

O equipo do "Xardín do Pasatempo" escolleu os libros máis novidosos, aqueles que coidamos poden mellor acompañar o lecer das familias que len xuntas. Libros con música, de produción propia, de realidade aumentada, da temática do PDI... Libros en galego, mais tamén en castelán, francés e inglés.

Recordade que cada mochila contén información para as familias, normas, contidos e un CADERNO VIAXEIRO no que o alumnado poderá debuxar, facer comentarios ...

Por último, as familias tamén poderán realizar os comentarios e suxestións que consideren oportunas nun apartado dentro do caderno. 

Lembrade, unha folla do caderno por nena ou neno.

Onte, 1º de outubro, un neno ou nena de cada aula de Primaria baixou á biblioteca onde Güino pola mochila da súa clase.

Hoxe foi o Equipo dos Axudantes de Güino o que achegou as "Mochilas Viaxeiras" ás aulas de E. Infantil.

 

Recordade que cada mochila contén información para as familias, normas, contidos e un CADERNO VIAXEIRO no que o alumnado poderá debuxar, facer comentarios ...

Por último, as familias tamén poderán realizar os comentarios e suxestións que consideren oportunas nun apartado dentro do caderno. 

Lembrade, unha folla do caderno por nena ou neno.

Que gocedes da viaxe!!!

Fin de curso!

Xa chega o verán e mañá rematan as clases. Hoxe tivemos un acto de valoración e agradecemneto da participación nas actividades da biblioteca.
Entregamos diplomas e pequenos agasallos aos "Axudantes de Güino", á participación nos "Clubs de Lectura" e ao neno e á nena "Máis Lector e Lectora".
Tamén presentamos as "Recomendcóns Lectoras " que realizaron en formato de" Booktraile" a rapazada dos clubs de lectura de 6º.

Grazas a tod@s!!

Ademais como fin do PDI "Bo Proveito" temos a exposición dunha seleccións de materiais elaborados en todas as aulas e por todos os equipos do centro, aberta a toda a Comunidade educativa.
Dende E. Infantil ata 6º curso, dende a Biblioteca a EDLG, D. de Orientación, Aulas Bilingües,...
Todos e todas traballamos mán con man ao longo deste 2019/18

Parabéns. Feliz verán!

PDI Bo Proveito no tempo de Entroido.

COLABORACIÓN FAMILIA - ESCOLA

Para abrir o tempo de Entroido, xa pasou a Candieira,  Emma, a nai de Ana de 5ºB, preparou  freixós para toda a rapazada de 5º.

Trouxo unha freixoeira ou filloeira e foinos facendo mentres  explicaba unha chea de cousas interesantes:

• Ela segue a receita que aprendeu da súa avoa

• Para 4 litros de auga
• 8 ovos
• 250 g de fariña do país.
• 225 de fariña branca.
• Touciño para engraxar a filloeira ou a tixola.

•  Contoulles tamén que agora é màis doado pois hai cociñas modernas e non hai que estar tan pendente do lume como cando se facían no trespés queimando carozos de maínzo.
• Tamén  faloulles das variedades segundo a zona de Galicia ou dos diferentes países.
• Mentres facía os freixós falaron do Entroido, do pratos principal  desta festa e doutras sobremesas.
• Ao final degustaron un delicioso freixó. Que ben arrrecendía todo o cole!

Moitas grazas, Emma!

Logo nas aulas recolleron a experiencia escribindo diferentes textos.

Aquí  cóntannolo todo!

Que sorte tiveron, non?

Poesía en familia

"A poesía está por todas partes, o que importa é explorar para descubrila. A biblioteca escolar é un lugar privilexiado para estimular esa mirada que xogue a descubrir a poesía que se agocha nas paisaxes, na música, no cine, nunha noite estrelada, no baile do vento na herba, nos seres minúsculos que só podemos ver a través do microscopio, nesa música que engaiola, na palabra dos poetas, na tradición oral, nun texto que nos traspasa e nos obriga a mirarnos, nesa persoa que nos axuda a abrir os ollos para ver o que nos rodea, no último descubrimento científico (eses escutoides descoñecidos até agora), nesa voz que nos fala, nese abrazo que nos agarima... "

POÉTICAS DIVERSAS NA BIBLIOTECA ESCOLAR é o lema que a Consellería de Educación, Universidade e Formación Profesional  propón ás bibliotecas escolares para o curso 2018/2019, como chiscadela para descubrir a poesía que nos rodea, apoiádonos nos recursos e nas posibilidades da biblioteca escolar.

Unha das grandes temáticas   da nosa biblioteca ano tras ano é a POESÍA e desta vez chegounos da man dunha das nais do noso cole Sandra BELLÓN.  Esta xove poeta achegouse o pasado martes 18 de Nadal a presentarlle as súas poesías máis próximas á infancia e ás tradicións eumesas ao alumnado de 3º e 4º de Primaria. 

Vén de publicar o seu libro, incluido nas Recomendacións deste  Nadal para lectores adultos.

Preme para máis información

Aquí tedes retallos desta estupenda actividade grazas unha vez máis  á colaboración das familias coa biblioteca.

Pasamos unha marabillosa mañá! Grazas Sandra!

"Alén do mar": Barcos de defensa

Dentro do PDI o alumnado de 5º e 6º centrouse nos barcos: A súa construcción, os barcos ao longo do tempo e neste terceiro trimestre están a estudar a utilidade dos barcos na actualidade.

Hoxe tiveron a sorte de contar con Alberto Barral, familiar duns compañeiros de 5º. Alberto explicolles o uso dos barcos de defensa na Armada.

Agora xa saben que existen diversos tipos de barcos especializados en diferentes misións e usos. Que os barcos de defensa non só serven para actuar en guerras, senón que tamén existen buques-escola, oceanográficos, loxísticos... 

Tamén puideron ver unha travesía moi perigosa, de camiño a Canadá, na que o buque tivo que sortear ondas xigantescas.

 Transmítennos parte desta experiencia pois  Alberto compartiu amablemente a súa presentación para achegar a todos nós o vivido esta mañá na biblioteca.

Ollade algunha imaxe da charla.

Aquí queda un enlace coa páxina da Armada que nos recomendou Alberto. Nela podedes atopar moitísima información. Premede na imaxe!

Grazas a Alberto e a todas as familias que están a colaborar na marcha do Proxecto de Centro.

Os Maios

A festa dos Maios, tamén coñecida simplemente como os Maios, é unha festa popular de orixes ancestrais. Esta celebración primaveral adóitase celebrar o 1 de maio. Tiña antigamente connotacións rituais totémicas á divindade primaveral ou das árbores, que se foron perdendo co paso do tempo.

No noso cole este luns estivemos tod@s ben atarefados facendo os Maios:

• Trouxemos verdes, xesta, fiúncho, buxo,..; flores, margaridas, calas e camelias, principalmente, pois a primavera vén atrasada.
• Clasificamos  e coñecimos os seus nomes e características.
• Coa axuda das familias e o profesorado fixemos catro marabillosos Maios.
• Na festa cantamos cantigas tradicionais dos Maios que nos aprendeu o profe Emilio e tamén un baile.
• Magoa que o luns choveu e tivemos que facer a festa dentro, mais pasámolo moi ben, desfilamos e cantamos.

Pola contra, onte, Primeiro de Maio e día grande dos Maios en Pontedeume, tivemos máis sorte co tempo e puidemos saír desfilar cos nosos Maios polas rúas da vila:

Descansar no Xardín de Lombardero mentres cantabamos e pedíanos para o Maio.

Participar no Concurso de Maios na Alameda.

 E ata gañar dous trofeos!

 Como remate, unha merenda e agasallos  para  toda a rapazada de Pontedeume que achegou os seus Maios ao Concurso do Concello.

Noraboa a tod@s!!