O Couceiro viaxa pola Terra a través da prensa...

A idea xurdiu na asignatura Atención Educativa entre o alumnado de 6º de primaria que leva traballando nela desde principios de curso. A idea consistiu na recompilación de periódicos de países dos diferentes continentes. Para conseguir a prensa destes lugares, desde o colexio remitiron cartas ás distintas embaixadas destes países en España. A resposta foi formidable e así conseguiron periódicos de países como Xapón, China, Tailandia, Omán, Sudáfrica, Exipto, Cuba,...e toda Europa. Diferentes alfabetos, que se len de xeito distinto ao que están acostumados. A medida que ían recibindo a prensa, agrupárona por continentes, ademais complementaron a información cunhas cartolinas que conteñen detalles xerais de cada eestado (número de habitantes, moeda oficial, capital do estado, ubicación no mundo,...). Con todo este material montouse unha exposición no corredor da planta baixa do colexio que quedou inaugurada nestes días e permanecerá aberta todo o mes de abril. Aberta ao alumnado, aos pais, a outros centros e a todos aqueles que teñan curiosidade polo tema. Finalmente, os nenos e nenas de sexto elaboraron uns cuestionarios con preguntas xerais e específicas de cada publicación e que utilizará todo o alumnado do centro para investigar sobre o tema facendo unha especie de TRIVIAL con niveis adaptados en función das idades dos participantes.